AI LAKET!!

Ai Laket!! drogak erabiltzen dituzten eta erabili izan dituzten pertsonek osatutako euskal elkartea da, eta substantzien kontsumoarekin lotutako arriskuak murriztea du helburu. Elkartearen abiapuntua argia da: droga legalen zein ilegalen kontsumoa gure gizartean dagoen errealitatea da, eta, horregatik, informaziotik, erantzukizunetik, errespetutik eta aurreiritzirik gabe landu behar da.

Elkarteak prebentzio-, prestakuntza- eta esku-hartze programak garatzen ditu aisialdi eta kontsumo espazioetan. Bere ekimenen artean daude informazio zerbitzuak, substantzien analisia, gazte eta nerabeei zuzendutako ekintzak, lonjekin eta botiloiekin lotutako proiektuak, baita ikastetxeetan egiten diren prestakuntza jarduerak ere. Helburua da pertsonei tresna erabilgarriak eskaintzea, erabaki kontzienteagoak hartu eta balizko kalteak murriztu ahal izateko.

Ai Laket!!-ek drogen inguruko ikuspegi kritiko eta errealista defendatzen du, pertsona erabiltzaileen eskubideen alde eginez eta osasunean, autonomia pertsonalean eta arriskuen murrizketan oinarritutako politikak sustatuz.